கஞ்சா மற்றும் போதைப்பொருள் விற்பனை செய்வோர் மீது கடும் நடவடிக்கை எடுக்க வேண்டும் எனத் தமிழக அரசுக்குச் சட்டப்பேரவை எதிர்க்கட்சித் தலைவர் எடப்பாடி பழனிசாமி வலியுறுத்தியுள்ளார்.அவர் தனது அறிக்கையில், கஞ்சா மற்றும் போதைப்பொருட்களால் இளைஞர் சமுதாயமும், பள்ளி கல்லூரி மாணவ மாணவியரும் பாதிக்கப்படுவதாகக் குறிப்பிட்டுள்ளார்.மாணவ மாணவியர் போதைப் பழக்கத்துக்கு ஆளாவதும் அவர்களை இதிலிருந்து மீட்க முடியாமல் பெற்றோர்கள் தவிப்பதும் தொடர்ந்து வருவதாகக் குறிப்பிட்டுள்ளார்.இளைஞர் சமுதாயத்தைப் போதையின் பிடியில் இருந்து மீட்க ஆக்கப்பூர்வமான வழிகளைக் கையாண்டு காவல்துறையைச் சுதந்திரமாகச் செயல்பட அனுமதிக்க வேண்டும் என வலியுறுத்தியுள்ளார்.

புயல் நிவாரணப் பொருட்களைத் திருடியதாக மேற்கு வங்கச் சட்டப்பேரவை எதிர்க்கட்சித் தலைவரான சுவேந்து அதிகாரி, அவர் சகோதரர் ஆகியோர் மீது வழக்குப் பதியப்பட்டுள்ளது.சுவேந்து அதிகாரியின் சகோதரர் சவுமேந்து அதிகாரி, காந்தி நகராட்சியின் முன்னாள் தலைவர் ஆவார். அவர் நகராட்சியின் கிடங்கை வலுக்கட்டாயமாகத் திறந்து அங்கிருந்த ஒரு லட்ச ரூபாய் மதிப்புள்ள புயல் நிவாரணப் பொருட்களைத் திருடியதாகத் திரிணாமூல் காங்கிரசைச் சேர்ந்தவர் புகார் அளித்தார்.இதையடுத்து சுவேந்து அதிகாரி, அவர் சகோதரர் ஆகிய இருவர் மீதும் வழக்குப் பதியப்பட்டுள்ளது.